ምእመናን በሚሰሙት ቋንቋ መማር አለባቸው፣ አገልግሎቱ በሚፈለገው መጠን መስፋት አለበት የሚለው ቤተ ክርስቲያን የተመሠረተችበት መሠረታዊ ዓላማ ስለሆነ ቸል ሊባል አይገባውም። እንዲያውም እንዲህ ዐይነቱ ጥያቄ በተገልጋዩ ሳይቀርብ አገልግሎቱን በሚመራው መዋቅር ቀድሞ መታሰብ ያለበት ነው። ይህን ለመሰሉ ጥያቄዎች አግባብነት ያለው መልስ በጊዜው አለመሰጠቱ የጥያቄውን ዐውድ እንዲቀየር፣ ጥያቄውም በሌሎች በማይመለከታቸው አካላት ሳይቀር እንዲጠለፍ ዕድል ይፈጥራል። አሁን በገቢር በቤተ ክርስቲያን ውስጥ እያየን ያለነውም ይህኑ ነው። በሚሰሙት ቋንቋ መማር የሚገባቸውን የእምነቱ ተከታዮች አገልግሎት እንዲያገኙ ማድረግ የቤተ ክርስቲያን ሰማያዊ ግዴታ ነው። ቤተ ክርስቲያንን ማንም በዚህ ቋንቋ አስተምሪ በዚህ አታስተምሪ ብሎ ትእዛዝ ሊሰጣት አይችልም፣ አይገባምም።

ቅድስት ቤተ ክርስቲያን ለጳጳሳት ምርጫ የምትጨነቀውም ለመንጋው የማይራሩ ክፉዎች ተሾመው ምእመናንን ከእግዚአብሔር እንዳያራርቋቸው ነው። ቅድስት ቤተ ክርስቲያንን የጳጳሳት ምርጫ የሚያሳስባት ዓላማው ሰማያዊ፣ ተልእኮው ሰውን ለመንግሥተ ሰማያት ማብቃት በመሆኑ ነው። ጳጳሳት ኖላዊ መሆናቸውን የተረዱ አባቶችም መንበራቸው ክፍት በሆኑ አህጉረ ስብከት ላይ የሚመድቧቸው አባቶች ማንነት ያሳስባቸዋል። ጉዳዩ አሳሳቢ የሚሆንበት የመጀመሪያው ምክንያት ለጵጵስና የሚመረጡ አባቶች ምግባረ ብልሹ ከሆኑ ሰዎችን ለድኅነት ማብቃት ሲገባቸው ከድኅነት ስለሚያርቋቸው ነው።