የቋሚ ኮሚቴዎች እና ንዑሳን ኮሚቴዎች የውስጥ አሠራር መመሪያዎች ትግበራ ሂደት ላይ ገለጻ ተሰጠ

በኢ/ኦ/ተ/ቤ መንበረ ፓትርያርክ የሰ/ት/ቤቶች ማደራጃ መምሪያ የሰ/ት/ቤቶች አንድነት በመላው ዓለም ለሚገኙ ሰ/ት/ቤቶች የሚሰጠውን አገልግሎት ዘመኑን በዋጀ ተደራሽነት ወጥነት እና ዘላቂነት ባለው አሠራር ለመምራት እንዲያስችለው የሚያግዝ የቋሚ ኮሚቴዎች፣ የዋና ክፍሎች እና የንዑሳን ኮሚቴዎች የውስጥ አሰራር መመሪያ ረቂቅ ሰነድ መዘጋጀቱን ተከትሎ ትላንት እሁድ የሰነዶቹን የትግበራ ሂደት የሚዳስስ የግንዛቤ ማስጨበጫ ገለጻ ለሥራ አመራር አባላት መሰጠቱን የአንድነቱ ም/ሰብሳቢ ዲ/ን ስንታየሁ ምስጋናው ገለጹ።

አንድነቱ የመጀመሪያውን ዙር የመሪ ዕቅድ ትግበራ አጠናቆ በአሁኑ ወቅት በሁለተኛው ዙር የመሪ ዕቅድ ትግበራ ላይ እንደሚገኝ የገለጹት ም/ሰብሳቢው በዕቅድ ከተያዙት ተግባራት መካከል የሰ/ት/ቤ/ትን ተቋማዊ ጥንካሬ እና የአፈጻጸም ብቃት ያለንበት ነባራዊ ሁኔታ በሚጠይቀው ደረጃ ማሳደግ መሆኑን ጠቅሰዋል። እንደ ምክትል ሰብሳቢው ገለጻ የቋሚ ኮሚቴዎችን፣ የዋና ክፍሎችን እና የንዑሳን ኮሚቴዎችን የዕለት ተዕለት አፈጻጸም በወጥነት እና በዘላቂነት ለመምራት በጎ ፈቃደኛ ባለሙያዎችን በማሳተፍ የተዘጋጁት የውስጥ አሠራር መመሪያዎች የሙከራ ትግበራ ሂደት የሰ/ት/ቤት ተቋም ግንባታ ሂደት አካል ሲሆን ዝግጅቱ ሙሉ በሙሉ ተጠናቆ ትግበራ ሲጀመር አንድነቱ ለሰ/ት/ቤቶች ዘመኑን የዋጀ አገልግሎት ለመስጠት የሚያስችለውን ተቋማዊ ብቃት ለማጠናከር አንድ እርምጃ ወደፊት የሚያስኬደው መሆኑ ይታመናል። የተዘጋጁት መመሪያዎችም የሰ/ት/ቤቶች አንድነት ውስጣዊ አሠራር የተቋማዊ አሠራር መገለጫዎች የሆኑትን ወጥነትን፣ ዘላቂነትን እና የማያቋርጥ መሻሻልን ታሳቢ ያደረጉ እንደሆኑ እና በዓለም አቀፍ መልካም ተሞክሮዎች ላይ የተመሠረቱ ዘመናዊ የሥራ አመራር ጥበቦችን ያገናዘቡ እንደሆኑ ምክትል ሰብሳቢው ገልጸዋል።

የመመሪያዎቹ የትግበራ ሂደት የአንድነቱን የመዋቅር አካላት የዕለት ተዕለት እንቅስቃሴ ከግምት ውስጥ ያስገባ እና የተቀናጀ ትግበራ ስልት አሳላጭ መንገዶችን ያካተተ ሲሆን ይህንኑ ሂደት በዋናነት የሚመራ አጋዥ ኃይለ ግብር ግብረኀይል በማካተት በሙያው የካበተ ልምድ ባላቸው የሥራ አመራሩ አባላት እንዲመራ በቋሚ ኮሚቴ ደረጃ የተዋቀረ መሆኑን ለመረዳት ተችሏል። የቋሚ ኮሚቴው ኃላፊ እንደገለጹት ኮሚቴው የመጀመሪያውን የስድስት ወር መሰናዶ ዕቅድ በመንደፍ ሥራውን የጀመረ ሲሆን በቀጣይ ሂደቶችም ከመነሻ የትግበራ ሂደቱ የሚገኙትን ተሞክሮዎች መሠረት በማድረግ እና የአህጉረ ስብከት ሰ/ት/ቤቶች አንድነት መዋቅር አካላትን በማሳተፍ በአህጉረ ስብከት ደረጃ ሥራ ላይ የሚውል ተመሳሳይ የውስጥ አሠራር መመሪያዎችን የማዘጋጀት እቅድ መኖሩ ገልጸዋል። የቋሚ ኮሚቴው ሰብሳቢ አያይዘውም በመላው ዓለም የሚገኙ የአህጉረ ስብከት ሰ/ት/ቤቶች አንድነት መዋቅር አካላት ብሎም አጥቢያ ሰ/ት/ቤቶች በዚሁ ዙሪያ በመጪዎቹ ወራት በሚኖረው የትግበራ ሂደት እንዲሳተፉ እና የሚጠበቅባቸውን ግብዓት እንዲሰጡ ጥሪያቸውን አስተላልፈዋል።

በአንድነቱ የውስጥ አሠራር ማሻሻያዎች ዙሪያ ከተጠናቀቁት ተግባራት መካከል በያዝነው የትምህርት ዘመን መጀመሪያ የተለቀቀው የአንድነቱ ድረ ገጽ መሆኑን የገለጹት ምክትል ሰብሳቢው በቀጣይ ሂደቶችም በርካታ የተቋም ግንባታ ሥራዎች መታቀዳቸውን እና የሰ/ት/ቤቶች ተሳትፎ ከመቼውም ጊዜ በበለጠ የሚበረታታ መሆኑን አስታውሰዋል።

በትግበራ ሂደቱ የግንዛቤ ማስጨበጫ ላይ ከተነሱት ነጥቦች መካከል ቤተ ክርስቲያናችን በአሁኑ ወቅት እያጋጠማት ያለውን ውጫዊ ፈተና ሰ/ት/ቤቶች በተሻለ ተቋማዊ አንድነት ላይ ቆመው ለመመከት የተቀናጀ፣ ዘላቂነት እና ወጥነት ያላቸው የውስጥ አሠራርን የሚያቀላጥፉ የተቋም ግንባታ መርሖዎችን መከተል እንደሚገባቸው ተገልጿል።

የሰንበት ት/ቤቶች አንድነት መዋቅር ቤተ ክርስቲያን በሰ/ት/ቤቶች ማደራጃ መመሪያ በኩል የምትሠራውን ሥራ የበለጠ ዘመኑን በዋጀ መልኩ ተደራሽ ለማድረግ በጥቅምት ወር 2006 ዓ.ም በቅዱስ ሲኖዶስ ደረጃ መመሪያ ወጥቶለት ሥራ የገባ መዋቅር ነው፡፡ መዋቅሩም በዋናነት ሁሉም ሰንበት ት/ቤቶች ዘንድ ወጥ የሆነ የአገልግሎት ሥርዓት ከመዘርጋት በተጨማሪ ተተኪው ትውልድ ወጣቱ ከተናጠል አገልግሎት ተናባቢና ተልዕኮ መር አገልግሎት ውስጥ በሁሉም ዓለም ተደራሽ ለማድረግ ታሳቢ በማድረግ የተቋቋመ አደረጃጀት በመሆኑ ቅዱስ ሲኖዶስ በሰጠው ኃላፊነት መሠረት ይህ በሀገር አቀፍ ደረጃ የሚዘጋጀው የውስጥ መመሪያ፣ በአኅጉረ ስብከት፣ በወረዳ ቤተ ክህነትና በአጥቢያ ደረጃ በተመሳሳይ እየተዘጋጀ እንደሚወረድ ዕቅድ ተይዞ እየተሠራ መሆኑም ተገልጿል፡፡

ዘጋቢ፡  በግንኙነት ክፍል ቋሚ ኮሚቴ የውጭ ግንኙነት ዋና ክፍል የዜና እና ወቅታዊ መረጃዎች ዝግጅት ንዑስ ክፍል